Koloretsua, bizia eta musikaz eta dantzaz beterikoa. Horrelako ikuskizuna prestatu du Gora Musikak, haurrentzako taldeak. 100 dantzari, 44 erraldoi eta Pamplonesa musika banda ikusiko ditugu taula gainean igandean, ekainaren 8an, Gora Musikaren eskutik. Elkartasun jaialdi erraldoia prestatu dute Nafarroa Arenan, San Fermin aurreko giro betean egingo dena.
Diru sarreraren zati bat ANELA eta Hodeilargi elkarteentzat izango da, hurrenez hurren, alboko esklerosi amiotrofikoa eta Batten gaixotasun arraroa duten pertsonen alde lan egiten duten elkarteak.
Hodei eta Ilargi Lizarraldeko neba-arrebak Batten izeneko gaixotasun arraroa dute. Bizi esperantza ez da oso handia eta hartu behar dituzten sendagaiak oso garestiak dira. Bi ume hauen gaixotasunaren berri emateko sortutako Hodeilargi izeneko elkartearentzat joango da sarreren diruaren zati bat. Alboko esklerosi amiotrofikoa dutenen alde lan egiten duen ANELA elkartearentzat ere joango da beste zati bat.
Nafarroa Arenako pistan 200 artista baino gehiago arituko dira ikuskizunari bizia eta kolorea ematen. Sorpresa asko egongo direla iragarri dute antolatzaileek eta lagun oso bereziez inguratuko dira: ikastola eta eskola desberdinetako 100 dantzari eta Iruñeko Aldezar, Mendillorri, Barañain, Ezpelur, Burlata, Atarrabia eta Bidasoako erraldoiak, 44 guztira. 20 kanta izango dira osotara, guztiak Pamplonesa musika bandak zuzenean joko dituenak.
Sanferminen aurreko giroa piztu nahi dute ikuskizunarekin eta ikusleei zuriz eta gorriz jantzita joatea eskatu diete. Nafarroa Arenako harmailak betetzea espero dute taldeko kideek. 14 eurotan eskuratu daitezke, Nafarroa Arenako webgunean.
Irrintzi Plaza saioa Urko Oskoz Gora Musika taldeko kidearekin hitz egin dugu igandeko ikuskizunaz.